२०८१ पुष २६, शुक्रबार ०८:१५
कृषि विकास बैंकले प्रक्रिया छलेर जग्गा लिलाम गरेको आरोप लगाउँदै पीडित परिवारले आन्दोलन गरेका छन् ।
आन्दोलन गरेपछि प्रहरीले जर्वजस्ती बलप्रयोग गर्दै धपाएका थिए । जिल्लाको लहान नगरपालिका–२ का रामचन्द्र यादवको पूर्व–पश्चिम राजमार्गमै टाँसिएको ७ धुर जग्गा बैंकले प्रक्रिया मिचेर लिलाम गरेको भन्दै उनको परिवार बिच्चली भए पछि आन्दोलित भएको छ । उनीहरु राजमार्गमै सुतेर बैंकविरुद्ध नारावाजी गर्दै बिलौना गरिरहेका थिए ।
सडकमा ऋणी परिवार सुतेर विरोध प्रदर्शन गर्न थालेपछि राजमार्ग आवागमन ठप्प भएको थियो । प्रहरीले आन्दोलनको समर्थनमा पुगेका स्थानीयवासीमाथि जवर्जस्ती बलप्रयोगत गरी लाठी चार्ज गर्दै धपाएका थिए । त्यसपछि प्रहरीले रामचन्द्रको परिवारलाई घिसारेर सडकबाट हटाएर राजमार्ग खुलाएका थिए ।
सिरहा प्रहरीले आन्दोलनकारीलाई घिसारेको भिडिओ सामाजिक सञ्जालमा धेरैले सेयर गर्न थालेका छन् । जग्गा लिलामसम्बन्धी विवादमा एउटा समूहले बैंक जलाउन खोज्दा बल प्रयोग गरेको इलाका प्रहरी कार्यालय लहानका नायब प्रहरी उपरीक्षक विष्णुप्रसाद सोतीले जानकारी दिए । उनले सडकमा सुतेपछि ज्यान जोगाउनकै लागि भए पनि आफूहरुले बाध्य भएर हटाएको जिकिर गरे । तर सडक खुलाउने नाममा पीडित परिवार र आन्दोलनमा सहयोग गर्नेमाथि प्रहरी निर्मम बनेको स्थानीयवासीको आरोप छ ।
रामचन्द्रले ०७७ फाल्गुन १५ मा कृषि विकास बैंक लहान शाखाबाट ३० लाख रूपैयाँ ऋण लिएका थिए । मंसिरको किस्ता तिरेको उनको दाबी छ । यता बैंकले भने आफूहरुमाथि गलत आरोप लगाएको दाबी गरेको छ ।
